2016(e)ko mai. 30(a)
GAO 2016 Orioko Zaragueta eskolan
Maiatzaren 27an GAO eguna izan zen. GAO hiru herri desberdinetako eskolek ospatzen dugu urtero: Getaria, Aia eta Orio, horregatik du izen hori. Aurten Zaragueta eskolan tokatzen zen eta hara joan ginen goizeko 10tarako. Iritsitakoan motxilak toki batean utzi eta frontoira joan ginen jaialdiarekin hasteko. Lehendabizikoak Oriokoak izan ziren dantza moderno eta kantu batzuekin. Horiek bukatutakoan, getariarrek kantak eta dantza batzuk egin zituzten. Segidan, 30 minutuko atsedenaldia izan genuen hamaiketakoa jateko eta pixka bat jolasteko.
11.30tan berriro frontoian elkartu ginen denak jaialdiarekin jarraitzeko. Orduan gure txanda izan zen. Hasteko. 1. eta 2. mailakoek “astoa ikusi nuen” eta “nik katu bat ikusi dut” abestiak eskaini zizkiguten. Ondoren guk, alegia 3. eta 4. mailakoak, “eztarri erdian”, “sua amaitzean” eta “Fatuio” piezak abestu genituen Txapasekin.
Jaialdia bukatzeko “Antton bat eta Antton bi” kantua abestu genuen denon artean. Jarraian kale-jiran ibili ginen frontoian bertan.
Ondoren, hondartzaren ondoan dagoen parkean jolastu eta bazkaldu egin genuen. Jandakoan, berriro jolastera joan ginen; orduan Oriokoak eta Getariakoak etorri ziren eta hondartzara jaitsi ginen taldeka hondarrezko irudiak egitera. Taldeka erabaki behar genuen zer egin. Batzuk gazteluak egin genituen, beste batzuk animaliak (dortokak, kaimanak…).
Bukatutakoan gauzak jaso, oinetakoak jantzi eta autobusera joan ginen Aiara etortzeko.
Guk, 3. mailakook, oso-oso ondo pasa genuen.
2016(e)ko mai. 26(a)
2016(e)ko mai. 25(a)
2016(e)ko mai. 19(a)
2016(e)ko mai. 12(a)
2016(e)ko mai. 11(a)
2016(e)ko mai. 10(a)
Sumendiaren esperimentua
Gaur goizean esperimentu bat egin dugu Xabier ikasleak ekarri duen materialarekin. Esperimentuaren bitartez, benetako sumendiak nola lehertzen diren ikusi dugu.
1.- MATERIALA
• Sodio bikarbonatoa
• Koloratzailea
• Ozpina
• Plater txikia
• Jogurt potetxo bat
• Nahasteko makila
• Xiringa graduatua
• Koilaratxoa
2.- EGITEKO MODUA
Lehenengo, jarri potea plateraren gainean.
Segidan, bota potetxoan 2 koilarakada sodio bikarbonato.
Ondoren, koloratzaile 2 txorrotatxo bota xiringarekin eta makilaz nahastu.
Bukatzeko, nahasketari ozpina bota xiringaz eta behatu gertatzen dena.
3.- ZER GERTATU DA?
Ozpina bota dugunean, potearen ahotik apar gorri bat ateratzen hasi da. Horrela, sumendi baten kraterretik laba nola ateratzen den irudikatu dugu.
4.- ZERGATIK GERTATU DA?
Ozpinaren azidoa bikarbonatoarekin nahastean, erreakzio kimiko bat eragin dugu eta apar gorria sortu da koloratzailearengatik.
2016(e)ko mai. 6(a)
Pagoetako irteera (2016/05/06)
Gaur, maiatzak 6a, LHko 3. eta 4. mailakoak Pagoetako parkera joan gara landare eta animalien bizitza hobeto ezagutzera. Autobusak Laurgaingo Palazioaren parean utzi gaitu eta han zegoen Siratz Iturrarango monitorea gure zain.
Siratzek lau taldetan banatu gaitu eta bakoitzari kolore bateko zinta bana eman digu: arrosa, laranja, urdina eta berdea. Gero lehiaketa bat egin dugu, berak egindako galderei ondo erantzunez gero, domina bat eman digu. Jolasaren bukaeran hizki batzuen bitartez ezkutuko hitz bat asmatu behar zen eta hitz hori azkonarra zen.
Ibilbidean barrena gauza asko ikasi ditugu: animalien sailkapena, elika katea, landareen ugalketa… eta talde-lana egin dugu denbora guztian. Hamaiketakoa egiteko denbora ere izan dugu. Hamaiketakoa egin dugun tokia garbi eta txukun utzi behar zen beste domina bat irabazteko.
Eguerdian Iturraran aldera jaisten gara eta Sarrola inguruan oreinak, betizuak eta pottokak ikusi ditugu, baita basurdeen hanka markak eta txarrantxaren azpitik pasatzen direnean utzitako ileak ere.
13:30ak inguruan Iturraranera iritsi eta ondo zelaiko mahaietan eseri gara bazkaltzeko. Iritsi garenerako Oiartzungo eskola bateko ikasle pila zeuden. Haiekin iskanbila batzuk izan ditugu gurekin sartzen hasi direlako.
Bazkaltzen bukatutakoan, Iturrarango harrera-etxean sartu gara Siratzek gauza batzuk erakutsi nahi zizkigulako. Goiko pisura joan, han dagoen mahai luze baten inguruan eseri eta orein-adarrak eta disekatutako azkonarra eta basakatu batzuen buruak erakutsi dizkigu.
15:00ak aldera, handik atera eta Agorregira jaitsi ondoren, eskolarantz igotzen hasi gara. Bidea ez da luzea baina bai neketsua, batez ere Gorostiola bitarteko puska aldapa gogor bat delako. Azkenean nor bere martxan iristen joan gara eskolara.
Oso ondo pasa dugu eta asko ikasi dugu.
2016(e)ko mai. 5(a)
"Aviones de Papel"
Gaur, soinketa ondoren, "Aviones de Papel" filmea ikusten hasi gara gure gelan. Protagonistak Dylan du izena. Egun batean eskolara joan zenean, praktiketako irakasle batek gelakoei esan zien paperezko abioiak egiten erakutsiko ziela. Hegazkinak egin ondoren lehiaketa bat egiten zuten eta bereak 50 metro egin zituen hegan.
Dylan klasifikatu egin zen Australia mailako txapelketan parte hartzeko.
Bitartean gauza asko egin zituen bere aita eta bere aitonarekin abioiak ondo-ondo egiten ikasteko. Aitonak bazituen garajean abioi eta kohete zahar batzuk eta gelako Kevin mutilaren laguntzaz, hegaldatzen lortu zuen.
Australiako txapelketan postu ona lortu zuenez, Japonera joan zen han ospatzen zelako munduko txapelketa. Japonen Jason eta Kimi neska japoniarra ezagutu zituen.
Azkenean hirurak izango dira munduko onenak eta indarrean zegoen errekorra hiruek hobetu zuten.
Bitartean gauza asko egin zituen bere aita eta bere aitonarekin abioiak ondo-ondo egiten ikasteko. Aitonak bazituen garajean abioi eta kohete zahar batzuk eta gelako Kevin mutilaren laguntzaz, hegaldatzen lortu zuen.
Australiako txapelketan postu ona lortu zuenez, Japonera joan zen han ospatzen zelako munduko txapelketa. Japonen Jason eta Kimi neska japoniarra ezagutu zituen.
Azkenean hirurak izango dira munduko onenak eta indarrean zegoen errekorra hiruek hobetu zuten.
Harpidetu honetara:
Mezuak (Atom)